Djali nga Smira synon të bëhet i famshëm

Nëntëmbëdhjetëvjeçari, Arbër (Riza) Ibishi nga Smira, i cili aktualisht jeton në Gjenevë të Zvicrës, synon të bëhet i famshëm përmes boksit. Ai është i vetëdijshëm për rrugën e vështirë që ka nisur, por thotë se ka vullnet ta vazhdojë me përkushtim. Që nga mosha 11 vjeçe për pesë vite është marrë me karate, por qe tri vite ka nisur boksin, në “Boxing Club Versoix”.

Arbëri thotë se ka shumë energji dhe atë dëshiron ta zbrazë përmes goditjeve. “Në karate kur shkojsha nuk më kënaqke sepse aty më shumë ka teori dhe mësim se si bëhen katat e karatesë. Pra më mungonte goditja. Unë kam qef me u rrah, pra me u shfry mirë. Mirëpo, pasiqë nuk është e njerëzishme të rrahesh me njerëz në rrugë apo vende tjera, e kam zgjedhur ringun. Aty është vendi… edhe shfryhem edhe bëj sport”, thotë Arbëri për portalin tonë.

Mirëpo, kjo nuk është arsye e vetme që Arbërin e ka futur në ring. Ai përmes këtij sporti luftarak dëshiron të bëhet i njohur dhe shembull prej sportisti të mirë. “Në fillim prindërit na kanë dërgu, siç ju thashë, në karate bashkë me të vëllain tim Shkodranin, vetëm të jemi ta angazhuar pas mësimit, pra të merremi me diçka. Por pastaj sporti më hyri në gjak dhe tash dëshiroj të merrem me boks… dhe pse jo edhe të krijoj karrierë dhe të bëhem i famshëm. Kjo është ëndërra ime, pra që njerëzit të dëgjojnë për mua”, thotë Abëri.

Për këtë Arbërit i duhen ushtrime të vështira dhe të përditshme, ndonëse gjatë ditës punon në firmën e babit të tij Riza Ibishi “Ibishi Sarl” e cila merret me renovim. “Unë ushtroj gjashtë ditë në javë nga një orë e gjysmë. Katër herë në javë në palestër duke bërë ushtrime dhe sparing dhe dy herë në javë jashtë palestrës duke vrapuar. Është vështirë, por tashmë e kam krijuar shprehinë dhe kam kondicion të mjaftueshëm. Nuk lodhem lehtë”, thotë ai.

Boksieri i ri smiras thotë se për të nisur rrugën e sporteve kuftarake kanë ndikuar edhe idhujt e tij, boksieri Majk Tajson dhe kik-boksieri tashmë i ndjerë Besim Kabashi. “Sidomos e kam dashur Besim Kabashi dhe më ka lënë përshtypje qëndrueshmëria e tij. Ai ka qenë vështirë të rrëzohej dhe nuk dorëzohej kurrë edhe pas shumë goditjeve të forta që merrte”, shprehet Arbëri Ibishi.

Arbëri ka marrë pjesë në disa turne që janë mbajtur në Zvicër, por dëshirë e tij është të boksojë edhe në Kosovë në ndonjë turne kur t`i ipet rasti, sepse vendin e tij nuk e harron dhe e do shumë. Këtë e vërteton edhe niveli i tij dhe gjuha shqipe të cilën e flet rrjedhshëm, ndonëse në Zvicër kishte shkuar kur i kishte pasur vetëm tri vjet.

Arbëri në fund të bisedës për portalin tone, para se të kthehej në Gjenevë, iu bën thirrje edhe të rinjve tjerë, këtu e në diasporë që të merren më shumë me sport apo kulturë, sepse kështu edhe e kalojnë kohën më mirë, por edhe e ndërtojnë veten, në aspektin fizik dhe psikik.