Smirasit në Shkup në përpjekje për të mbajtur lidhjet

Smirasit në Shkup edhe një herë janë takuar me qëllim të majtjes së komunikimit mes tyre.  Shoqata “Smira Dardane” me kryetarin Zijadin Sylejmani ka mbajtur takimin tradicional të radhës, në të cilin morën pjesë smiras që jetojnë kryesisht në Shkup dhe bashkëvendas të tyre nga Smira dhe Shqipëria. Takimet e tilla, dhe jo vetëm ato, organizohen me qëllim të mbajtjes dhe forcimit të lidhjeve midis smirasve nga Shkupi dhe origjina e tyre në Smirë.

Zijadin Sylejmani ka shprehur brengën për përfshirjen  e vogël të smirasve që jetojnë në Shkup.

“Unë nuk po shoh ndonjë pengesë të që të mos punojnë dhe të mos vazhdojmë rrugën, e cila na ngriti aq lart duke na  njohur dhe lidhur të gjithëve. Ne duhet të angazhohemi deri në maksimum në mënyrë që ne vërtetë të jemi shembull i përkushtimit të mbështetjes dhe respektimit të njëri-tjetrit. Organizimet e Shoqatës “Smira Dardane” në Shkup, të Shoqatës “Smira” në Gjenevë, por edhe aktivitetet që mbahen në vendlinjen tonë në Smirë, janë vlera që nuk i ka asnjë komunitet tjetër në rrethin  ku jetojmë. Shoqata ndërtoi ura bashkëpunimi edhe me Smirën. Përmes këtyre urave kemi krijuar lidhje  të mira edhe me bashkëvendasit që punojnë në vende të ndryshme të Evropës si dhe në Shqipëri. Përmes këtyre lidhjeve u njohëm me shumë të arritura të njerëzve tanë smiras. Për punën tonë flitet gjithandej, prandaj këto vlera duhet t`i ruajmë”, ka thënë Sylejmani.

Ai ka lutur të gjithë që të angazhohen dhe të përfshihen më shumë, në mënyrë që komunikimi  dhe raportet që janë krijuar të forcohen edhe më shumë. Sylejmani ka falënderuar familjen e tij dhe mahallën Halilaj që e ka mbështetur deri më tani në organizimin e aktiviteteve të ndryshme.

Drejtori i shkollës së Smirës “Dëshmorët e 5 Prillit”, Xhavit Sahiti, ka falënderuar shoqatën “Smira Dardane” që ka  krijuar këto lidhje midis smirakve. Sipas tij, këto lidhje në të ardhmen mund të krijojnë ura bashëpunimi edhe në fusha tjera, si në: arsim, sport, kulturë e pse jo edhe në investim. Sahiti ka përmendur se në librin e tij për arsimin i ka interesuar se sa smirakët në Maqedoni dhe Shqipëri janë zhvilluar dhe sipas tij ata qëndrojnë mjaft mirë në aspektin e shkollimit.

Enver Ferizaj ka thënë se  të jeshë nga Smira është një kënaqësi e madhe sepse smirakët kudo që kanë shkuar  kanë lënë nga një emër, kanë lënë nga një vepër dhe po lënë në vazhdimësi.

“Smira është fshat me histori të vjetër. Këtë e tregon edhe simboli i Smirës. Profesoresha Edi Shukriu më ka thënë që ky është një nga zbulimet më të mëdha që mund të jenë bërë në Kosovë dhe Smira është thesar i pazbuluar akoma. Smira është dalluar edhe me shkollë, sepse ka dhënë shumë arsimdashës  dhe njerëz të sholluar. Përmes kësaj Smira ka arritur të bëhet një fshat jashtëzakonisht i zhvilluar”, ka thënë Ferizaj.

I kënaqur që për herë të parë po merret pjesë në këtë tubim u shpreh edhe djali I vepritmarit të njohur Hetem Pajaziti, Ismeti,  i cili jeton në Fier të Shqipërisë. Ai ka falënderuar të gjithë organizatorët që kanë bërë të mundur takimet dhe lidhjet midis smirakve kudo që gjenden.

Hoxha i fshatit Smirë Gafurr Ramadani ka shfaqur respektin për gatishmërinë e smirakve për t`u takuar dhe për të forcuar lidhjet. Sipas tij, vizitat midis njerëzve janë të parapara edhe në mësimet fetare, sepse ato na pasurojnë në përgjithës dhe e fisnikërojnë akoma më shumë shpirtin e njeriut.

Për të pranishmit janë dhuruar libra nga autorët Xhavit Sahiti dhe Nazif Laçi, kurse Shoqata “Smira Dardane” ka nderuar me mirënjohje dhe dhurata disa individë.

Manifestimi ka vazhduar me darkë të përbashkët të shtruar nga shoqata dhe me muzikë e argëtim.