Nexhmedin Hetemi shkon në pension, i lavdëruar dhe i nderuar nga shoqëria

Nexhmedin Hetemi nga Smira, ka shkuar në pension me lavdatat dhe nderimin më të madh nga shoqëria. Kolegët nga Shkolla e Mesme Profesionale “Jonuz Zejnullahu”, në Viti, i organizuan një aheng në shenjë falënderimi e mirënjohjeje. Ata nuk rreshtnin së thëni fjalët më të çmuara dhe më të bukura për të. Fjalimet e tyre zgjatën më shumë se një orë, sepse gati të gjithë kishin nevojë ta nderonin sekretarin e tyre me fjalë lavdi për punën dhe sjelljet e tij.

“Nexhmedin Hetemi ka bërë punë dhe kontribut të çmuar për shkollën tonë. Por, vjen një moment në jetë, kur njeriu edhe duhet të pensionohet, siç është dita e sotshme për sekretarin tonë. Në emër të kolektivit të shkollës e falënderoj për angazhimin e tij 39-vjeçar në arsim. Është nder për ne që kemi pasur një njeri të tillë në mesin tonë. Të gjithë kemi kaluar kohë të çmuar me të. Ai do të mbetet gjithmonë i yni, sepse kujtimet dhe puna e tij nuk harrohen kurrë”, tha drejtori i shkollës, Feti Sahiti.

Nexhmedin Hetemi duke përshëndetur ish-kolegët e tij, i falënderoi ata për bashkëpunimin e mirë dhe përkrahjen që i kanë dhënë në punë. “Të nderuar kolegë, vitet po kalojnë dhe ja erdhi koha të përshëndetem dhe të ndahem nga puna me ju së bashku. E di se do të më mungoni, por jeta e ka kështu dhe unë duhet të ndahem nga ju. Detyra e mësimdhënësit është e shenjtë, prandaj ju uroj suksese të mëtutjeshme dhe angazhim edhe më të madh për arsim edhe më cilësor. Ju falënderoj për respektin që ma keni bërë”, tha Nexhmedin Hetemi.

Për të nderuar Nexhmedin Hetemin dhe për të shënuar pensionimin e tij, aty ishin edhe zyrtarë të Drejtorisë së Arsimit në Viti. “Çkado që themi për të është pak, sepse Nexhmedini përveç punës profesionale që ka kryer në shkollën profesionale e karakterizon një anë tjetër edhe më e rëndësishme, sepse ai është një njeri i cili ka virtyte jashtëzakonisht të larta. Sado që unë po e them këtë, ju jeni ata të cilët e dini edhe më mirë”, tha zyrtari arsimor Shefik Sadiku.

Fjalët e kolegëve për seriozitetin, sinqeritetin dhe përkshtimin e Nexhmedin Hetemit, i vërtetoi edhe ish-drejtori i Gjimnazit në Viti, Jahja Halabaku. “Me Nexhën kam punuar 32 vite. Dhe na ka rastisur të punojmë edhe në kohën më të vështirë që ka kaluar arsimi shqip në Kosovë, pas viti 1990. Nexhmedini për çdo muaj, më shumë këmbë se me biçikletë, ua ka shpërndarë rrogat mësimdhënësve në 13 punkte sa kemi pasur atëherë, nëpër fshatra, qoftë në shkolla, lokale private apo shtëpi, sepse e dini se kemi qenë të penguar nga regjimi i atëhershëm. Kjo punë le që ka qenë e vështirë, por edhe e rrezikshme, sepse ai ka mundur edhe të pësojë çdo moment nga policia serbe. Prandaj puna e tij është për çdo lavdatë, sepse ai kurrë nuk është kursyer për shoqërinë”, tha Halabaku.

Sekretari i Gjimnazit “Kuvendi i Lezhës”, në Viti, Zejnullah Halili, i cili ka kaluar kohë të gjatë me të tha se do t`i mungojë shumë. “Ai është shembull i një njeriu të përkryer, në të gjitha aspektet. Është i urtë dhe i qetë. Unë e pranoj se do ta kem vështirë pa te, sepse kemi kaluar kohë dhe kujtime të mira, edhe si kolegë, por edhe si bashkëfshatarë që jemi”, thotë Zejnullah Halili. Poaq falënderues për Nexhmedin Hetemin por edhe i mërzitur që po u shkon nga mesi i tyre, shprehet edhe profesori i Gjuhës dhe Letërsisë Shqipe, Avdyl Imeri. 

Kurse profesori i lëndëve Bujqësore, ing. Nagip Demiri, tregon se Nexhmedin Hetemin e ka pasur edhe kujdestar. “Ka qenë fantastik. Ai na ka pajisur me dije në aspektin profesional, por edhe na ka edukuar dhe ka qenë shembull. Prof. Nexhmedini do të na shërbejë gjithmonë si udhërrëfyes në punë dhe jetë”, thotë prof. Nagipi.

Fjalë miradie për punën, sjelljet, veprat dhe qëndrimin e Nexhmedin Hetemit, thanë edhe kolegë tjerë të tij. Edhe familjarët që ishin në këtë ceremoni krenohen me personalitetin e Nexhmedin Hetemit. “Unë mburrem me prindin tim dhe posaqërisht ndihem shumë mirë, kur njerëzit më nderojnë dhe më respektojnë që jam djali i tij. Ka punuar shumë dhe ka bërë shumë për ne, për të na rritur dhe edukuar si duhet. Për këtë i kemi borxh tërë jetën”, thotë i biri i tij, Kujtimi.

Në shenjë respekti për punën e palodhshme, Drejtoria komunale e Arsimit në Viti i ndau mirënjohje. Kurse kolegët e shkollës i ndanë mirënjohje dhe një orë dore si kujtim. Derisa profesori i Edukatës Fizike, Skender Halili i kishte bërë personalisht si dhuratë një orë muri. Përveç këtyre, me kontributin e kolegëve u shtrua edhe një darkë për të dhe u pre torta për ditëlindjen e Nexhmedin Hetemit.

  BIOGRAFIA E NEXHMEDIN HETEMIT

Nexhmedin Hetemi lindi më 7 tetor 1947 në Smirë. Shkollën fillore e mbaroi në Smirë dhe Goshicë. Gjimnazin e mbaroi në Gjilan, kurse Fakultetin e Kimisë, shkallën e parë, në Universitetin e Prishtinës.

Punën e ka filluar në vitin 1968 në fshatin Skifteraj si arsimtar, pastaj në vitin 1975 është punësuar në Smirë. Në vitin 1978 fillon punën në Shkollën e mesme në Viti si profesor i Kimisë, kurse nga viti 2001 punon si sekretar në Shkollën e Mesme Profesionale “Jonuz Zejnullahu”, në Viti.

Gjatë karrierës së tij Nexhmedin Hetemi ka qenë shef ndërrimi apo përgjegjës i paraleleve të ndara në Goshicë, pastaj ka punuar si arkëtar dhe së fundi edhe si sekretar.

Ai përveç karrierës profesionale njihet edhe si organizator dhe pjesëmarrës i aktiviteteve dhe aksioneve të ndryshme që janë zhvilluar në fshatin Smirë.