Tortë me 95 qirinj për ditëlindjen e axhës Kadri

Shitësja në  market  u habit kur kërkuam  95 qirinj të ditëlindjes. Ajo, thjesht nuk besonte se i kishim për ditëlindjen e vetëm një njeriu. Befasinë axhës Kadri Pajaziti nga Smira, ia kishte përgatitur familja. Për ditëlindje i kishte bërë një tortë  të madhe sepse duhej vend për gjithë ata qirinj.  Ai i mbushi rrafsh 95 vjet. Kjo vizitë e portalit tonë është menduar të bëhet më herët, por e kemi shtyrë për simbolikë edhe të ditëlidnjes së axhës Kadri.

Sipas psikologëve, njeriu i ka tri mosha: e para është biologjike, e dyta si ndihet  dhe e treta si duket njeriu. E, xha Kadri me gati një shekull jetë mbi supe, edhe ndihet mirë, por edhe duket i konsoliduar për moshën që e ka, vetëm vjetët që nuk mund t`ia heqësh. Ai as sot nuk përdor barna dhe kurrë nuk ka qenë i sëmurë.

Thotë se këtë moshë e ka arritur vetëm duke menduar pozitivisht dhe duke punuar. “Zoti me ka ndihmuar të jem kështu dhe të jetoj kaq gjatë. Kurrë nuk jam sikletuar, apo nervozuar. Gjërat i kam marrë me qetësi dhe si diçka normale që i ndodh njeriut. U bë-u bë. Kam besuar se jeta e ka udhën e vet dhe se njeriu nuk mund të përzihet në disa punë. Nuk jam marrë me punë të huaja. Kam punuar shumë, më së shumti tokën. Prej 13 vjet kam ndihmuar nënën për t`u kudjesur për bagëtinë. Nuk jam ndalur kurrë. Ka pasur raste kur kam bartur dru të rëndë deri 150 kg. I kam kqyrë vetëm punët e mia dhe të familjes sime”, thotë axha Kadri.

Gjatë jetës ka pasur periudha të vështira të jetës, sidomos në fëmijëri, kur familja e tij, por gati i gjthë fshati është ballafaquar me varfëri. “Ka qenë skamje dhe gazep. Nuk kemi pasur vend ku të qëndrojmë. Uleshim nëpër shkama afër zjarrit. Nuk kemi pasur dhoma të mira as konaqe. Tre veta mbuloheshim me një jorgan. Nuk kemi pasur dyshekë e cerga, kurse jastëkët i ruanim vetëm për ndonjë mysafir. Atëherë rrallë dikush e ka pasur shtëpinë pa kafshë brenda. Tek vonë kur kanë filluar njerëzit të zhvillohen ngapak dhe të ndryshojnë jetën. Ahmeti i Demiri i pari e ka ly shtëpinë me gëlqere. As ujë nuk kemi pasur boll”, rrëthen axha Kadri për vuajtjet që kanë pasur kur ka qenë i vogël.

Mendon se gjatë gjithë periudhave, jeta e shqiptarëve ka qenë e rëndë dhe e vështirë, kurse një lloj zhvillimi për ta, ka nisur pas prishjes së Serbisë. “Vështirë ka qenë. Krejt shqiptarët kanë vujt prej okupatorëve. Unë i kam përjetuar tre okupatorë. Qe në vitin 1945 serbët ma kanë pre dorën e djathtë dhe prej atëherë e kam gjysmë të aftë për punë, kurse një gisht më ka mbetur i palëvizshëm. Selimin tonë e rrahën shumë në shpi. Më thanë edhe mua të shtrihem, por unë kundërshtova dhe duke u kacafytur me ta, më prenë dorën me thikë”, thotë axha Kadri, duke na treguar dorën.

Gjatë jetës është marrë me bujqësi, por 20 vite ka punuar në ndërtimtari në Shkup të Maqedonisë. Tani e ka pensionin nga ky shtet. Për këtë kohë ka udhëtuar këmbë prej Smirës për në Stagovë dhe anasjelltas, shpesh duke bartur deri 20-30 kg furnizime për shtëpi, sepse këtu disa gjëra nuk janë gjetur.

Në këtë ditëlindje të veçantë ishte edhe Hysni Ahmeti. Ai tregon se axha Kadri del deri te shitorja dhe bisedojnë por shkon edhe te kusheritë tjerë që janë pak më larg. Kurse edhe ai e viziton shpesh në shtëpi. Axha Kadri thotë se tashti është më mirë, por njerëzit nuk po duhen shumë. “Përpara nuk kishim pasuri, por jemi repektuar dhe vizituar më shpesh. Tashti nuk ke me kend ta ndërrosh një llaf. Më së shumti rri me Ferizin, Brahimin e Idrizin. Edhe Hysnia vjen shpesh te unë. Më herët ardhshin prej katuni, prej kamosit te në odë. Unë i bëja hyzmet odës. Feriz Qaushi i Asllanoviqe, Hyseni i Sylës, Idrizi i Zenës, Hamit Zuka, Abedin Bibrraki etj, vishin te baba im-Ahmeti dhe mixha Ibishi-ky ka qenë kryetar i katunit. Krejt e kanë dashur Ibishin”, thotë axha Kadri.

Smirën e mban mend me vetëm rreth 70-80 shtëpi, kurse fshati sot është zgjeruar dhe zhvilluar shumë. Axha Kadri mendon se tashti jemi shumë mirë dhe nuk merret me disa gjëra që i ka sjellur koha. “Kurrë nuk ma ka marrë mendja se do të vijë kjo ditë dhe do të kem jetë të tillë me gjithë këto të mira. Unë jam i kënaqur me këtë jetë. Të gjihë kujdesen shumë për mua dhe më duan. Edhe unë i dua të gjithë, nuk e dalloj asnjë fëmijë tim ose anëtar tjerë të familjes. Jam me krejt djemt e mi”, thotë axha Kadri.

Këtë e vërteton edhe vajza e tij, Sevdija e cila bashkë me burrin Avdylin dhe djalin Arbenin kishin ardhur enkas nga Sadovina e Muhaxherëve për ditëlindjen e axhës Kadri. Bile i kishin sjellë edhe një tortë. “Gjithmonë ka qenë i qetë dhe i rehatshëm. Ka qenë punëtor i madh dhe kurrë nuk ka bërë zhurmë ose fjalë për diçka. Gjithmonë jemi kënaqur me te. E meriton një kujdes të veçantë. I urojmë ditëlindjen dhe i dëshirojmë edhe shumë vite tjera jetë”, thotë vajza e tij Sevdija. Tortëi kishte bërë edhe vajza e djalit-Arta.

Plaku  më i vjetër në Smirë, nuk harron të na porositë disa herë, që t`i ruajmë të mirat që i kemi arritur, sepse në të kundërtën mund t`i humbim.

Duke na përcjellur thotë se ndihet akoma mirë dhe më i ri-bile për nja 20 vjet. “I shoh disa pleq që nuk i kanë më shumë 60-70 vjet edhe nuk mund të dalin”, thotë Axha Kadri.

Ai na rrëfen se deri para një viti ka shkuar këmbë edhe deri te Ara e Hanës, por tashti ec vetëm nëpër lagje. Thotë se gjumi e zë mirë kurse edhe oreksin e ka të mirë dhe nuk zgjedh në bukë-i ha të gjtiha ushqimet. Edhe kujtesa  akoma nuk e ka tradhtuar. Ai e lut Zotin që t`ia bëjë itë lehtë edhe pjesë tjetër të jetës.

Axhës Kadri Pajaziti nga Smira, i dëshirojmë shëndet të mirë dhe jetë të lumtur.

URIME DITËLINDJA E 95-të, AXHA KADRI!