“Epopeja e UÇK-së”-himn për Jasharajt

Adem Jashari lindi më 28 nëntor 1955,  në Prekaz të Drenicës,. I ati  Shabani ishte i kujdesshëm me të gjithë fëmijtë,  por ndaj Ademit tregonte një kujdes të veçantë, ndoshta pse i kujtohej dita e lindjes, që koincidon me Ditën e Flamurit.   Xha Shabani ishte bujk, por pas Luftës së Dytë Botërore, për një kohë pati ushtruar profesionin e mësuesit. Mirëpo, ai  do të  largohet nga procesi mësimor, për shkak të veprimtarisë atdhetare. Ai vendosi të merrej me punimin e tokës dhe edukimin e fëmijëve në frymën e atdhetarizmit. Kështu po rritej Ademi së bashku me vëllezërit më të mëdhenj, Rifatin  dhe Hamzën. Ademi kishte një interesim të veçantë për armët dhe për bëmat e prekaziotëve gjatë historisë….

Adem dhe Hamez Jashari ecën guximshëm rrugës së luftëtarëve kombëtarë, duke ngritur si në cilësi e në sasi numrin e luftëtarëve të lirisë e të pavarësisë, duke ngritur cilësin e luftës çlirimtare, me çka ndryshuan rrjedhat e historisë dhe hapën një epokë të re – Epokën e Ushtrisë Çlirimtare të Kosovës.
Demonstratat e vitit 1981, të cilat u shndërruan në Lëvizje të madhe popullore, që me vite mbajten të ndezur flakadanin e lirisë e të çlirimit të kombit, patën ndikim magjik në brezin që formuan, organizuan dhe udhëhoqen politikisht dhe ushtarakisht Ushtrinë Çlirimtare të Kosovës. Adem Jashari dhe çeta e tij ka qenë dhe ka mbetur bërthama themelore e UÇK-së.
 Adem Jashari  shkoi në Shqipëri për të përsosur artin e luftës, të cilin e përvetësonte me shpejtësi të rrufeshme, dallohej nga i gjithë brezi i tij. Kur në fund të vitit 1991, në Kosovë po bëheshin arrestime të të gjithë atyre që ishin përgatitur në Shqipëri, Adem Jashari do të njoftojë çetën e tij dhe të kërkojë nga ata, që të ishin vigjilent se çdo natë armiku mund t´u trokiste te porta.

Dhe, nuk vonoi dita kur armiku do të trokas në portën e Jasharëve. Ishte mëngjesi i hershëm i 30 dhjetorit 1991, ku armiku me një makineri të tërë policore kishte rrethuar Jasharajt dhe kërkuan dorëzimin e Adem Jasharit dhe Jasharëve tjerë. Adem Jashari me vëllezër e shokë apelit të armikut për dorëzim iu përgjigj me breshëri armësh nga shumë drejtime. Kështu nisin aksionet luftarake mbi policinë e armikut, fillimisht në Drenicë, e për t’u përhapur më vonë ne Llap e Dukagjin, në Drini e kudo në Kosovë.
Pas luftës se 26 nëntorit 1997, në Llaushë të Re, ku mori pjesë Ademi me çetën e tij, armiku do të bëjë plane për zhdukjen e Adem Jasharit. Kjo do të ndodhë me 22 janar 1998. Një  ekspeditë policore-ushtarake serbe, kishte sulmuar familjen Jashari, me qëllim që të zhdukej kjo çerdhe e rrezikshme e Ushtrisë Çlirimtare të Kosovës. Por, falë  gjakftohësisë e guximit të familjes dhe ndihmes që erdhi nga çeta, armiku u tërhoq pa arritur qëllimin.
Forcat serbe, pas  disfatës së 22 janarit kishin  filluar përgatitjet për një sulm të përmasave të mëdha policore dhe ushtarake, dhe ky sulm do të fillojë në mëngjesin e hershëm të 5 marsit  1998, pak ditë pasi policia armike kishte pasur një disfatë te Lisat Binak, në Likoshan. Këtë herë forca të mëdha ushtarake dhe policore e kishin rrethuar Prekazin, me orientim kryesor Lagjen e Jasharëve. Lufta për eliminimin e Jasharëve ishte e rreptë. Armiku Prekazin e kishte vendosur në rreth të hekurtë dhe sulmonte nga shumë anë. UÇK-ja aso kohe i kishte mundësitë e kufizuara të sulmit e të depërtimit.
Përkundër një rezistence të gjatë dhe herioke, armiku arriti të djegë e shkatërrojë Lagjen e Jasharëve, por jo kurrë vendosmërinë për të vazhduar luftën për liri e pavarësi. Ushtria Çlirimtare e Kosovës humbi prijetarin e saj. Kosova fitoi komandantin legjendar. Me aktin e rënies se Jasharëve, Kosova mundi frikën dhe për lirinë e pavarësinë u hapen shtigje të reja.
Adem Jashari – legjendë, solli kualitet të ri në filozofinë dhe mendësinë e shqiptarëve për jetën, atdheun, lirinë,  nderin dhe dinjitetin e kombit. Rënia heroike e Adem Jasharit i dha shtytjen më të fuqishme mobilizimit, strukturimit dhe profesionalizimit të Ushtrisë Çlirimtare të Kosovës, e cila në vitin 1998 doli publikisht.
Më 5 mars të vitit 1998 bashkë me komandantin legjendar Adem jashari u vranë edhe 56 anëtarë tjerë të familjes Jashari.

Sot  kulla e Jasharëve është shndërruar në Kompleks Memorial, të cilin për çdo ditë  e vizitojnë mijëra qytetarë nga Kosova, trojet shqiptare  dhe  vende tjera.

Në nderim dhe përkujtim të kësaj ngjarjeje, nën përkujdesjen e Qeverisë së Kosovës, për çdo vit , prej 5-7 mars, mbahet Manifestimi treditor përkujtimor “Epopeja e UÇK-së”, që është si një himn për këtë familje.

LAVDI komandantit legjendar Adem Jashari dhe familjes së tij!