Agimi synon këtë vit të sfidojë dhe njërën nga ndërtesat më të larta në botë siç janë: Në Malajzi 88 kate, në Tajvan 102 kate, në Nju Jork 96 kate, ndërtesa e milarderit Donalt Tramp, në Dubai më e larta në botë 160 kate 857 metra e lartë.
Pastaj Agimi në muajin prill mendon ta rikthejë rekordin e tij të Ginisit, në goditje të topit ulur këmbëkryq, të cilin para tri vitesh ia theu një suedez. Agimi shpreson se do të arrijë marrëveshje me RTK-në që rekordin e Ginisit ta realizoj në Kosovë. Kjo ngjarje planifikohet të përcillet nga zyrtari i Librit të Ginisit që do të vijë nga Londra dhe të transmetohet direkt në RTK.
Ai shprehet se është i gatshëm të përballojë me sukses këto rekorde, por i duhet më shumë përkrahje. Rekordmeni botëror, deri tani, nuk është i kënaqur me mbështetjen që i është dhënë. Përkrahjen më të madhe e ka pasur nga familja, miqtë dhe të afërmit. Agimi, pret që në të ardhmen të ketë ndihmë më të madhe nga institucionet , sponsorët dhe shoqëria në përgjithësi.
Ndryshe, i ftuar nga Klubi i rekordeve të botës “Saxonia” me qendër në Lajpcig të Gjermanisë, nga redaksia e Librit të Ginisit dhe nga Qyteti i Cyrihut, para pak kohe ka qëndruar në Zvicër. Ai per portalin fshatismire.com ka treguar se atje, para komisionit, nga një orë, ka demonstruar katër rekordet e botës dhe një të Ginisit.
Ai deri tani ka arritur disa rekorde botërore në disa disiplina. Suksesi i tij i fundit ishte më 30 maj 2010. Në ndërtesën më të lartë në Frankfurt të Gjermanisë, Kulla e Panaireve (Messe Turm), ia doli që në disiplinën ecje shkallëve të ndërtesës lartë-poshtë duke goditur topin me kokë pa ndërprerje të kalojë 5304 shkallë me kohë 1 orë 37 minuta e 5 sekonda. Agimi arriti që dy herë të ngjitet lartë dhe të zbresë poshtë shkallëve të kësaj ndërtese 60 katëshe me një lartësi 257 metra. Kjo ngjarje u përcoll nga shtëpi të mëdha televizive, Reuters, RTL , SAT 1, N 24. Pjesëmarrjen e Agim Agushit në këtë ngjarje të madhe sportive e ka ndihmuar edhe Departamenti i Sportit.
Rekordet tjera të Agim Agushit:
1. Goditje e topit me kokë në ecje, 15.356 km për 3:12:39 orë, 27 Tetor 2002, në Mynih (Gjermani).
2. Goditje e topit me kokë ndërmjet dy lojtarëve, Agim Agushi dhe Bujar Ajeti, 11,111 goditje për 3:55:20 orë, 9 nëntor 2003 në Starnberg (Gjermani).
3. Goditje e topit me kokë i ulur në tokë: 4:02:01 orë, më 14 gusht 2005 në Flensburg, Gjermani (rekord i Ginisit).
4. Goditje e topit me kokë gjatë ecjes me makinë kabriolet: 7 kilometra, më 17 Gusht 2004 në Antalia (Turqi).
5. Ecje lartë e poshtë shkallëve duke goditur topin me kokë: 3896 shkallë në ndërtesën e Qeverisë së Kosovës, më 30 maj 2009 , për 1 orë e 12 min. e 29 sekonda.
