Nxënësit në pushim veror

Mësuesja Saranda Jetishi po u shpërndante sot librezat shkollore nxënësve të saj të klasës III-1, me notat që kishin marrë këtë vit shkollor.   Paraprakisht nxënësve iu komunikua rezultati i sivjetshëm, kurse ata shfaqën një program me recitime, këngë e skeqe për prindërit që kishin shkuar të përcillnin më të dashurit e tyre. Atmosferë e njëjtë ishte edhe në klasat tjera.  Urimet për rezultatet e mira dhe fotografitë me mësimdhënësit nuk mungonin.

Rreth 660 nxënës dhe rreth 38 punonjës të arsimit të shkollës fillore “Dëshmorët e 5 Prillit”, kanë filluar nga sot pushimin veror. Sot iu komunikua suksesi nxënësve prej klasës së parë deri në të pestën, kurse nesër do rezultati do t`u tregohet nxënësve prej klasës së gjashtë deri në të nëntën.

  Afrim Ahmeti që kishte ardhur për të parë rezultatin njëvjeçar të fëmijëve të tyre tha se ishte ndarë i kënaqur me suksesin që kishin arritur fëmijët e tij. “Shumë mirë. Jam i lumtur që viti u kurorëzua me sukses dhe fëmijët po shkojnë në pushimin e merituar. Mblodhën frytet e punës njëvjeçare. Natyrisht është dashur të punohet me ta edhe në shtëpi, sepse suksesi është i përbashkët”, ka thënë Afrimi.

Mësuesja Tahire Bajrami është e kënaqur me suksesin që kanë treguar nxënësit e saj të klasës së dytë. “Në përgjithësi nxënësit kanë arritur të përpunojnë të gjithë planpgroramin për sivjet. Për këtë është dashur punë sistematike. Nuk kam pasur ndonjë problem të theksuar. Nxënësit kanë qenë të mirë. Iu dëshiroj pushime të këndshme”, ka thënë mësuesja Tahire.

Drejtori Naim Agushi ka thënë se do të mbledhin suksesin e të gjitha klasave dhe do të bëjnë një analizë si dhe një raport krahasues me vitin e kaluar. “Kemi kaluar një vit shkollor. Angazhimi i mësimdhënësve dhe i nxënësve nuk ka munguar por ta shohim si do të dalin rezultatet e përgjithshme të shkollës. Si suksese të shkollës sivjet mund të përmendim projektet e SHHB “Nëna Terezë”,  për pajisjen e kabineteve të Fizikës, Kimisë dhe Biologjië, me mjete dhe materiale të nevojshme, projektin për kabinetin e informatikës nga Banka Botërore, pastaj shpërblimin e klasës V-1 të mësueses Adile Sahiti në konkursin kombëtar KOSOVISION CONTEST, mandej shpërblimin me vendin e parë të grupit “Yjet” me vendin e parë  në garat komunale në vallëzim, si dhe shpërblimi me vendin e tretë poashtu në vallëzim të klasës së Ganimeve Shabiut. Mirëpo sivjet kemi dështuar në Kuzin komunal të diturisë. Siç e dini jemi diskualifikuar në javën e  parë.

Për këtë kemi bërë analizat e duhura dhe kemi vendosur që të mobilizohemi në mënyrë që niveli i mësimit të ngritet në përgjithësi në shkollën tonë”, ka thënë Agushi.

Bankat shkollore preson nxënësit e Smirës që t`u kthehen  më 1 shtator me energji të reja për t`u pajisur me dije dhe edukatë.