Imer Sejdiu dhe Diellza Berati fitues të krosit shkollor në Smirë

Imer (Mirali) Sejdiu,  nga klasa VIII-2, e Shkollës fillore “Dëshmorët e 5 Prilli” në fshatin Smirë, është fitues i krosit shkollor në konkurrencën e meshkujve, që u organizua të shtunën, më 21 maj 2011, nga arsimtari i Edukatës Fizike, Shaqir Ibrahimi. Imeri shtegun e gjatë 600 metra e kaloi për 2 minuta e 42 sekonda, kurse i dyti ishte Florim (Fazli) Quni, poashtu nga kl. VIII-2, me kohë 2 minuta e 46 sekonda.

Në konkurrencën e femrave e para doli Diellza (Sulltan) Berati nga kl. VIII-2, me kohë 3 minuta e 30 sekonda, kurse pas saj arriti Naza (Afrim) Ahmeti, nga kl. VIII-1, gjashtë sekonda më vonë. 
Arsimtari Shaqir tregon se fituesve  do t`u jepen medalje. Sipas tij kjo është një garë kolektive e paraparë me planprogramin e rregullt mësimor, si garë individuale.
“Përveç se plotësojmë planin mësimor,  ky aktivitet është i rëndësishëm edhe për argëtim, relaks dhe për socializim më të mirë të nxënësve. Natyrisht është edhe një lloj stimulimi i tyre që të merren më shumë me sport dhe të zhvillohet shpirti  garues midis tyre”, thotë ai.

Karakteristikë e kësaj gare ishte se tre nga katër vendet e para i morën nxënësit e klasës VIII-2. Arsimtari i Edukatës  Fizike thotë se kjo është rastësi, sepse ora mësimore zhvillohet për të gjithë njëjtë dhe me metoda të caktuara. “Vrapimi është aftësi e lindur. Dikush vet është më i shpejtë dhe më i qëndrueshëm. Pikërisht Imeri dhe Diellza janë sportistë të mirë. Kanë kondicion dhe janë elastik e me trup të ndërtuar”, thotë arsimtari Shaqir.
Imeri ndihej mirë që doli i pari. Ai sikur e parandjeu këtë, sepse para se të niseshin,  na sugjeroi ta fotografonim atë sepse thoshte se do të ishte fituesi.  “Unë nuk ushtroj rregullisht, por nganjëherë dal vrapoj në livadhe. Ndoshta kjo aftësi më tepër e kam nga lindja”, thotë Imeri.
Edhe Diellza, ndonëse ndiente lodhje,  shprehej e lumtur dhe e gëzuar që fitoi. “Po, natyrisht është mirë kur në ndonjë garë dallohesh nga të tjerët. Fundja ky është edhe qëllimi i garës”, shprehet Diellza.