Shkolla pastron ambienti në “Ditën e Tokës”

Nxënësit dhe kolektivi i Shkollës fillore “Dëshmorët e 5 Prillit”, të Smirës, kanë marrë pjesë në aksionin vullnetar për pastrimin e ambientit, në Ditën Ndërkombëtare të Tokës. Ata,  kanë hequr mbeturinat nga oborri i shkollës dhe nga hapësirat publike të fshatit.

Sekretari i shkollës që po koordinonte punën, Isak Rexhepi këtë iniciativë e vlerëson  si të qëlluar dhe të dobishme.

“Natyrisht, për pastrim ka nevojë gjithmonë, sepse ambienti duhet të mbahet si duhet. Sidomos tani në pranverë të heqen mbeturinat nga dimri. Dhe kemi bërë punë të mire, po shihet ndryshimi. Kemi pastruar oborrin e shkollës dhe jemi ndarë në grupe për të pastruar qendrën dhe të gjitha  rrugët e fshatit. Është mirë që aksionet të tilla të ketë kohë pas kohe-jo vetëm kur shënohet ndonjë ditë siç është 22 Prilli-Dita e Tokës. Këto aktivitete, përveç në përmirësimin e gjendjes ekologjike, ndikojnë edhe në ngritjen e vetëdijes për ruajtjen e ambientit ku jetojmë”, shprehet Isak Rexhepi. 

Aksioni në nivel komunal është  shtrirë edhe në fshatrat tjera të komunës dhe në vet qytezën e Vitisë. Aksioni është organizuar nën patronazhin e kryetarit të komunës Nexhmedin Arifi me  qëllim krijimin e një ambienti të shëndetshëm dhe të pastër për njerëzimin. Për këtë qëllim komuna ka siguruar qeset e najllonit për bërllok, dorëzat dhe bartjen e mbeturinave në deponitë përkatëse.  Aksionit për pastrimin e rrugëve, shesheve dhe oborreve të shkollave ju bashkuan nxënësit e shkollave fillore dhe të mesme, institucionet, OJQ-të dhe qytetarët.

Dita e planetit tokë festohet çdo vit me 22 prill në më shumë se 175 vende të botës dhe ka për qëllim ndërgjegjësimin e njerëzve në lidhje me rëndësinë e natyrës.
 Dita e Planetit të Tokës për herë të parë është shënuar më 22 prill të vitit 1970. Kjo ndodhi me nismën e senatorit amerikan Gaylond Nelson, kur edhe u organizuan protesta masive për mbrojtjen e mjedisit.