“Festa e Abetares” në Smirë

Nxënës të klasave të para të Shkollës fillore “Dëshmorët e 5 Prillit”, në Smirë, kanë shënuar “Festën e Abetares”, e cila përkon me ditët shkollore kur  nxënësit e klasave të para duhet të kenë mësuar 36 shkronjat e alfabetit. Kështu ata i  dhanë lamtumirën librit të tyre të parë-Abetares, për të vazhduar tutje rrugën e gjatë për dije.

Nxënësit  e klasës së mësueses Ganimete Shabiu kanë shfaqur sot para prindërve dhe mësimdhënësve një program të larmishëm artistik. Një pjesë të madhe të programit, ata,  ia kushtuan pikërisht Abetares-mjetit që u dha alfabetin. 
“Jam e lumtur që bashkë treguam  para prindërve se kemi bërë diçka. Natyrisht nuk ka qenë lehtë, ka pasur vështirësi derisa i kanë mësuar të gjitha këto vjersha, këngë e valle, por kryesorja besoj se ia kemi arritur qëlllimit dhe të pranishmëve iu ka pëlqyer programi. Për këtë e kam pasur edhe mbështetjen e prindërve”, thotë mësuesja Ganimete, tek po u ndante në fund nxënësve pjesë nga torta e merituar.
Një manifestim të pasur për nder të përfundimit të Abetares dje ka organizuar me klasën e tij edhe mësuesi Mustafë Hamiti. Këngë, valle, vjersha e pika tjera e kanë karakterizuar “Festën e Abetares”. “Kemi punuar gati  2 muaj me nxënësit. Jam i kënaqur me atë që kanë treguar dhe poashtu me nivelin që kanë arritur në mësimin e alfabetit dhe në shkrim e lexim. Abetaren e kemi përfunduar. Tashti do të vazhdojmë me librin e leximit”, shprehet mësuesi Mustafë.
Vjersha, këngë, valle e pika të tjera u shfaqën para të pranishmëve të shumtë në “Festën e Abetares”, në Smirë.  Prindërit shpreheshin të entuziazmuar me programin dhe iu pëlqyen shumë pikat që u dhuruan fëmijët.  
“Shumë interesant. Është mirë që po e shënojnë përfundimin e Abetares dhe që po kalojnë në një fazë tjetër të mësimit. Ne këtë lloj feste nuk e kemi përjetuar kur kemi qenë të vegjël”, shprehej Arben Sejdiu.
I kënaqur ishte edhe Izjadin Ahmeti. “Mirë shumë. Jam i lumtur që nxënësit bënë shfaqje të mirë dhe u prezantuan bukur. Më pëlqeu krejt ajo që kishin përgatitur për ne”, thotë Izjadini.
Edhe Nijazi Fejzullahu u shpreh me fjalë të mira për atë që përcolli. “Na kënaqën me ato vjersha, këngë e valle. Për këtë e falënderojmë mësuesen që ka punuar me nxënësit. Është mirë që programe të ngjashme të bëhen më shpesh”, thotë Nijaziu.

Përndryshe, këtë festë me një program artistik do ta shenojë javën e ardhshme edhe mësuesja tjetër e klasës së parë, Habibe Ibishi.

“Festa e Abetares”, është bërë manifestim tradicional në shkollat e Kosovës, nga viti 2009, sipas një vendimi të ministrit të Arsimit Shkencës dhe Teknologjisë, Enver Hoxhaj.