Jonas për pushime në Smirë, ndihet si në shtëpi të vet

Falë raporteve të mira që njerëzit tanë kanë krijuar në vendet ku jetojnë dhe veprojnë në diasporë, tashmë janë shpeshtuar edhe vizitat e miqve të tyre nga ato vende në Kosovë. Ata vijnë për raste të ndryshme, dasma e festa por edhe për të kaluar ca ditë këtu. Edhe i riu Jonas Soulié (Zhonas Sulje), i lindur në Gjenevë nga prindër zviceranë, po i kalon pushimet verore në Smirë.

Njëzetvjeçari nga shteti helvetik, thotë se e kanë ftuar shokët e tij Shkodran e Arbër Ibishi, me të cilët kalon shumë kohë bashkë. Ai në Gjenevë ka edhe shokë të tjerë shqiptar si: Leartin, Gentin, Labinotin etj.

“Unë që nga shkolla fillore kam shokë shqiptarë. Prej atëherë kam një simpati dhe respekt të veçantë për ju dhe kam vazhdur të shoqërohem me shqiptarë edhe në shkollën e mesme. Shokët e mi janë të sjellshëm, të sinqertë dhe besnik. Unë i respektoj shumë, por edhe ata mua. Shkoj shpesh tek ta në familje dhe më presin ngrohtë. Më thërrasin edhe në dreka e darka. Edhe ata poashtu vijnë tek unë dhe familja i pret shumë mirë. Vashdimisht jemi bashkë. Mund të them se nuk ka ditë që nuk shihemi. Deri më sot nuk kam pasur asnjë fjalë me ta. Pra, kaloj tepër mirë në shoqërin e shokëve të mi nga Smira”, thotë Jonas.

Ai tregon se prindërit e tij e kanë mirëpritur ftesën për të ardhur për pushime në Smirë, sepse i kanë njohur mirë shokët e tij dhe nuk kanë pasur paragjykime ose dilema për këtë.

“Kjo është hera e parë që shkoj diku për pushime në familje të miqve. Me të vërtetë po më pëlqen këtu. Atmosfera është e mirë. Këtu njerëzit nuk janë shumë të stresuar, janë të qetë dhe mikpritës. Po ashtu edhe pozita e fshatit po më pëlqen-është si i tërhequr rrëzë maleve. Këtu është qetë dhe nuk ka zhurmë sikur në vendbanimet skaj rrugëve. Edhe atje ku jetojmë në Versoix në Gjenevë është më qetë se në pjesët tjera të qytetit”, thotë Jonas.

Zviceranit të ri, në Kosovë i pëlqen edhe ushqimi. Ai preferon më tepër piten dhe pasulin. Kurse me shokët e tij nga Smira, Arbërin, Shkodranin e Leartin ka vizituar edhe disa qytete tjera në Kosovë. Më së shumti i pëlqen Prishtina dhe Ferizaji. Jonas Soulié thotë se po kënaqet në Smirë dhe do të vijë sërish kur t`i jepet rasti.