Kurti në Smirë: Vëjani mendjen zhvillimeve politike, mos u mashtroni më

Udhëheqësi i Lëvizjes “Vetëvendosje”, Albin Kurti në një takim me banorë të fshatit Smirë, i njoftoi ata me qëndrimet e kësaj lëvizjeje për zhvillimet aktuale politike, por njëkohësisht edhe prezantoi programin dhe alternativën qeverisëse të saj për zgjidhen e problemeve kryesore në vend.

Ai ka thënë se sot në Kosovë e kemi shtetin e dobët, sepse e kemi pushtetin e korruptuar. Për të dalë nga kjo situatë, Kurti mendon se është e domosdoshme të mos vazhdojë dialogu i përhershëm me Serbinë, me ç`rast sipas tij, asaj po i bëhen lëshime, e Kosovës po i dëmtohet funskionimi i shtetit dhe perspektiva për sovranitet.

Ndërkaq Albin Kurti tha se “Vetëvendosje” mendon se Kosova ka nevojë urgjente për zhvillim ekonomik, duke i kanalizuar investimet kah prodhimi, e jo vetëm kah financat, shërbimet dhe tregtia, sepse prodhimi do të mundësonte vende të reja pune.

 “Në veçanti kur po them investime në prodhim mendoj në dy gjëra: në industrinë minerale energjetike dhe në bujqësi. Ka mundësi të përqendrohemi në bujqësi duke i subvencionuar bujqit tanë sa i përket plehut, farës, derivateve të naftës, kurse shteti ka për detyrë t`ua sigurojë tregun atyre. Nuk është në rregull që një bujk të mbjellë qepë këtu, e në doganë të hyjnë 29 maune me qepë nga Egjipti dhe t`ia rrëzojë çmimin për tokë”, ka thënë Kurti. Ai poashtu akuzon edhe bankat, të cilat kreditë për bujqësi i kanë me shkallën më të lartë të interesit.

Sa i përket integritetit terrirorial dhe shtetndërtimit, sipas tij, problemi kryesor në Kosovë është Mitrovica, kurse Kurti mendon se FSK duhet të shpallet dhe të bëhet ushtri, gjithashtu është dashur të revitalizohej Trepça dhe të mos shiten ndërmarrjet shoqërore. Kurse sa i përket liberalizimt të vizave ka thënë nuk e kemi të ardhmen e mirë, derisa ne flasim si mund të shkojmë si individ në Evropë, e jo si shtet.

Kreu i “Vetëvendosjes”, Albin Kurti, shprehu besimin se kjo gjendje e rëndë e krijuar nga qeverisja e keqe nuk do të zgjasë pafundësisht dhe se do të vijë koha kur secili do të përgjigjet për veprimet e dëmshme dhe antiligjore. Ai ka porositur të pranishmit, të organizohen dhe të jenë vigjilent, t`i vënë mendjen zhvillimeve politike edhe në Viti edhe për çështjen e Kosovës në përgjithësi dhe të mbajnë qëndrim të drejtë në mënyrë që të mos lejojnë të mashtrohen më.

Kurse kryetari i Qendrës së “Vetëvendosjes” në Viti, Prof. Dr. Sali Salihu, tha se kanë hartuar një strategji të thuktë dhe gjithëpërfshirëse për bujqësi dhe se kjo është fusha me prioritet në programin e kësaj partie. “Qeveria duhet të ndajë më shumë mjete për bujqësi. Ne kemi tokë të mirë të punueshme dhe fuqi të mjaftueshme punëtore të cilat mund të shfrytëzohen lehtë, nëse duam. Bujqit duhet të subvencionohen, farërat  dhe plehu të prodhohen këtu, pstaj derivatet për bujqësi të jepen me çmim më të lirë, kurse TVSH-ja të hiqet fare për prodhimet bujqësore”, ka thënë Prof. Salihu.

Pjesëmarrësit në takim u inkuadruan në debat me pyetje dhe komente për çështje të ndryshme, si për liberalizimin e vizave, bisedimet me Serbinë, programin e “Vetëvendosjes”, sistemin zgjedhor në Kosovë etj. .