Agim Agushi profesor i dalluar dhe sportist i jashtëzakonshëm

Njerëzit e Smirës, kudo që jetojnë dhe punojnë po vazhdojnë të lënë gjurmë dhe të krijojnë përshtypje të mira me nivelin dhe veprimet e tyre. Së fundi, ishte Agim Agushi që na bëri të ndihemi krenar se është i yni. Ai u zgjodh ndër pesë profesorët më të mirë të Gjimnazit “Kuvendi i Lezhës”, në Viti, në një anketë të bërë me nxënës dhe profesorë, nga Këshilli i nxënësve të këtij gjimnazi.

Në një rast tjetër, në vigjilie të 100-vjetorit të pavarësisë së Shqipërisë, Agimi, u nderua me mirënjohjen “Sportist i jashtëzakonshëm”, nga kryetari i komunës së Vitisë, Nexhmedin Arifi.

Profesori i matematikës dhe sportisti e aktivisti i dalluar, Agim Agushi, siç dihet tashmë, është pronar i disa rekordeve botërore në zhonglim me top futbolli.

Mirëpo, ai nuk pushon dot. Kohët e fundit është duke punuar në realizimin e një spoti televiziv, në bashkëpunim me Radio Televizionin e Kosovës dhe është duke u përgatitur për rekorde të reja. Për këto do t`ju njoftojmë së shpejti.