Dikush i “hëngri” trapat në rrugë

Ende pa u bërë as dy-tre muaj nga vendosja e tyre, është demoluar njëri nga trapat në rrugën kryesore të fshatit Smirë, të cilët  u vunë  aty për të mbrojtur këmbësorët nga shpejtësia e automjeteve. Edhe dy trapat·tjerë· u·dëmtuan· pjesërisht, por·ndërkohë u riparuan. Pengesat, apo siç quhen ndryshe “Policët e shtrirë”, u aplikuan si mjet për të parandaluar

shoferët që  kanë merak t`ju japin më shpejtë makinave. Me vendim të Drejtorisë  komunale të  Inspektoratit në Viti, prej Drobeshit deri në qendër të Smirës, janë fiksuar 3 pengesa të tilla.  

Pas asfaltimit dhe zgjerimit të rrugës, vitin  e kaluar,  shoferët u joshën që t`i ngasin më shpejtë veturat.  Mirëpo, ky vendim i autoriteteve kompetente, që ka ndryshuar  qarkullimin në këtë aks rrugor, ka ngjallur debate në fshat. Disa, e kanë mirëpritur vendosjen e pengesave, kurse disa të tjerë kanë qenë kundër vendosjes së tyre.

Inspektori komunal i komunikacionit, Bushat Zuka, pati thënë se vendimi është marrë pas kërkesës së Këshillit të fshatit, për të shtuar kujdesin ndaj këmbësorëve. Sipas tij, këto pengesa janë të përkohshme dhe në një të ardhme mund edhe të largohen me ndonjë vendim të ri të autoriteteve përkatëse.

Ndryshe, në muajin prill të këtij viti, Rr. Azizi, 6-vjeç, nga fshati Smirë, pati thyer njërën këmbë dhe pati marrë lëndime në kokë, në një aksident trafiku në rrugën kryesore, para shtëpisë së tij, përballë auto-mekanikut “Zeka”. Kurse, dy javë më vonë, tre veta u lënduan në një aksident tjetër, te varrezat e fshatit. Edhe para një muaji ka pasur një aksident në rrugën kryesore, por nuk ka pasur të lënduar.