Rrethi në qendër të Smirës me pamje të re

Oaza e gjelbër në qendër të fshatit Smirë merr  pamje të re. Rigon (Jahja) Zuka 15,  Shpresim (Ramiz ) Sylejmani 17  dhe  Halil (Bushat) Zuka 13, po pastronin, të dielën,  rrethin. Rigoni tregon se babi i tij e kishte porositur të dalë dhe të rregullojë këtë hapësirë publike.

 “Babi kishte blerë disa lule dhe më tha të dal ta bëj gati vendin. E thirra edhe Halilin, i cili nuk pritoi fare dhe m`u bashkua. Po e rregullojmë se bëhet më bukur. E pastruam, hoqëm barin e keq, tashti dhe do  të mbjellim lulet përreth”, thotë Rigoni.

Shpresimi tregon se ka dalë edhe ai t`u ndihmojë fqinjëve të tij në këtë aktivitet fisnik. “Dola edhe unë t`i bashkohem  kësaj iniciative. është pak punë, por që ndryshon shumë pamjen e qendrës së fshatit. Mendoj se do të duket bukur dhe  do të mirëmbahet. Më herët ka pasur pamje jo të mirë, sepse automjetet e kanë shkelur rrethin dhe e kanë prishur pak”,  thotë Shpresimi.

Halili ishte më i disponuari dhe mbante humorin në nivel teksa largonte mbeturinat, barin e hequr dhe gurët nga pjesa që  po përgatitej për të mbjellur lulet. “Këta trëndafilat që janë këtu, i kanë mbjellur banorët e qendrës, tashti ne po i rregullojmë dhe shtojmë akoma bukurinë me lule”, shprehej Halili.

Atyre iu ishte bashkuar edhe Ylli (Hesat) Zuka 7 vjeç, i cili na befasoi kur propozoi që në mes të rrethit të vendoset një  pishë apo bredh. Sidoqoftë, aksioni i këtyre djelmoshave, duhet përshëndetur dhe përkrahur për të përmirësuar pamjen e përgjithshme të fshatit dhe për të shtuar hapësirat e bukura në ambientin ku jetojmë.