Xuka, Bajrami e Sahiti, së bashku edhe me luftëtarë të tjerë nga Anamorava kishin shkuar në Sojevë për t`iu kundërvënë Ushtrisë serbe që po bënte masakra në Ferizaj dhe që pretendonte të vazhdonte më tutje drejt fshatrave tjera, siç edhe ndodhi në Sojevë, pastaj në Smirë, Kabash e Lubishtë.
Koordinatori i këtij projekti, Isuf Zuka, nga Smira, i tha portalit tonë se planifikohet që këta tre dëshmorë të kësaj lufte, të zhvarrosen dhe të rivarrosen në trekëndëshin e rrugës Smirë-Ferizaj, pranë varrezave të fshatit Gërmovë, ku edhe do t`u ngritet një lapidar.
“Para disa vitesh ne kemi vizituar vendin ku janë të varrosur Xukë Xuka, Bajram Ahmeti dhe Sahit Gorani, në Sojevë, në arën e Heset Mustafës, i cili vazhdimisht është kujdesur dhe e ka mirëmbajtur varrin. Këtë, para vdekjes, ua kishte lënë amanet edhe pasardhësve të tij. Pra, varri i përbashkët është mbajtur në gjendje të mirë për gati 100 vjet. Mirëpo, pavarësisht kësaj, ne kemi menduar që këta dëshmorë të kthehen tek rrënjët e veta, sepse shumë bashkëfshatarë tanë ndoshta as nuk e dinë që ata kishin rënë në luftë. Duke nderuar veprën e tyre dhe duke ua kthyer mbetjet mortore në vendlindje, dëshirojmë që ta trajtojmë si duhet këtë pjesë të historisë sonë”, ka thënë Zuka.
Ai ka treguar se ishte në propozim që dy dëshmorët e Smirës të rivarrosen në varrezat e fshatit në Bjeshkallavë, kurse Sahit Gorani të rivarroset në Gërmovë, por në fund është vendosur që ata të mos ndahen, pasiqë bashkë kishin rënë në luftë.
“Aty në hyrje të fshatit Smirë, në kënd, pranë varrezave të Gërmovës, do të ngritet një monument përkujtimor i përbërë nga një lapidar me emrat e të treve dhe një hapësirë tjetër me shtigje, drunj dekorativ e gjelbërim. Kemi menduar se ky vend është më i përshtatshëm, pasiqë është në kufi administrativ dhe korrespondon me fshatrat nga vijnë dëshmorët-dy nga Smira dhe një nga Gërmova”, është shprehur ai.
Tashmë është bërë kërkesa zyrtare në Drejtorinë Komunale të Kadastrit, për të destinuar vendin ku do të ngritet lapidari. Vetëm pritet përgjigjja e autoriteteve zyrtare dhe të fillohet me punët konkrete. Isuf Zuka tha në fund se pastaj do të hapet edhe llogaria bankare ku qytetarët mund të kontribuojnë me mjete financiare për realizimin e këtij projekti. /t.s/
