Revitalizohet komplet objekti i shkollës së Smirës

Ka filluar sot revitalizimi komplet i objektit të  Shkollës Fillore të Mesme të Ulët ‘Dëshmorët e 5 Prillit’, në Smirë.  Sipas një projekti të financuar nga Fondacioni  Kosovë-Luksemburg dhe Komuna e Vitisë fillimisht so të instalohet rrjeti i ri elektrik, pastaj do të ndërrohet kulmi si dhe do të bëhet fasadimi  brenda si dhe izolimi dhe fasadimi jashtë.

Kryetari i Komunës së Vitisë, Sokol Haliti me bashkëpunëtor para personelit arsimor tha se komuna e Vitisë është e përkushtuar të krijojë kushte sa më të mira për mësimdhënie dhe mësimnxënie. “Me të vërtetë po punojmë shumë sipas mundësive që i kemi që të krijojmë kushte më të mira për fëmijët tanë. Jemi të vëtëdijshëm se me arsimimin e brezave të rinj  ky vend pa dyshim se do të ecë përpara“, tha kryetari Haliti.

Drejtori i Shkollës ‘Dëshmorët e 5 Prillit’, Xhavit Sahiti, në emër të personelit dhe të gjithë nxënësve iu shprehu mirënjohje komunës e Vitisë dhe Fondacioni  Kosovë-Luksemburg për projektin e rivitalizimit të këtij objekti shkollor. “Faleminderit kryetarit së bashku me stafin e tij dhe Fondacionit Kosovë-Luksemburg për këtë projekt. Për mua sot është një ditë e veçantë pasi që objekti shkollor ku gjendemi është një objekt i vjetër dhe deri me tani pothuajse asnjëherë nuk është bërë një intervenim i mirëfilltë. Me këtë projekt po krijohet një ambient më i mirë për nxënës dhe sigurisht se kjo do të ndikojë edhe në përmirësimin  e procesit të mësimdhënies dhe mësimnxënies“,  u shpreh Sahiti.

Drejtori Sahiti bëri me dije se punimet nuk do ta pengojnë procesin mësimor dhe viti shkollor do të fillojë më 1 shtator, pasi që shkolla ka edhe aneksin e saj dhe është e përgatitur të vijoj mësimin gjatë punimeve.

Ndryshe, revitalizimi i objektit shkollor  është  vetëm njëra nga tri komponentet e një projekti më të madh me  të cilin Këshilli i Fshatit Smirë kishe aplikuar tek Fondacioni Kosovë-Luksemburg, por i cili nuk është aprovuar si i plotë.