Mërgimtarë smiras vazhdojnë të jenë të të bashkuar dhe lidhur mes vete. Smiras me familje, të rinj e të reja, prindër e gjyshër, nipa e mbesa, janë mbledhur të shtunën mbrëma në Gjenevë për festën e tyre tradicionale të përvitshme. Të ardhur kryesisht nga Gjeneva, por edhe nga Nyoni, Lozana e më larg, por edhe nga Franca, Itali, Gjermania etj, e ndonjë edhe nga Smira, edhe sivjet arritën të krijojnë atmosferë të mrekullueshme, të ngrohtë dhe vëllazërore. Për këtë arsye tashti të gjithë e quajnë “Festa e Smirës”, ndonëse zyrtarisht titullohet “Tubimi i smirasve në diasporë. Në kallaballakun që ishin në Salle des Fetes des Avanchets në Rue François-Durafour, binte në sy sidomos prania e madhe e të rinjve. Ky mbase ka qenë edhe qëllimi i organizimit të takimit prej fillimit-njohja e smirasve mes vete dhe forcimi i lidhjeve mes tyre. Për këtë më meritorët janë anëtarët e palodhshëm të kryesisë së Shoqatës “Smira” me seli në Gjenevë. Ata qe nëntë vite me radhë kanë bërë punë të madhe vullnetare, e kanë humbur kohën e tyre, kanë harxhuar mjete financiare dhe kanë derdhur shumë djersë, e kanë pasur shumë stres, vetëm e vetëm që të krijojnë një vlerë për të gjithë smirasit, në mënyrë që ata të mund të bëhen krejt bashkë një herë në vit. Kënga e vallja kanë vazhduar deri në orët e vona të natës, kurse është shtruar edhe Darka smirase me ushqimet dhe specialitetet që I kanë sjellë motrat dhe gratë e smirasve nga shtëpitë e tyre. Gjithcka ka shkuar mbarë e mirë deri në fund dhe të gjtihë janë ndarë të kënaqur me atë që përjetuan për më shumë se gjashtë orë të qëndrimit dhe shoqërimit së bashku. Sigurisht urimi i tyre I përbashkët ishte: “Shihemi prapë së bashku”!
Festa e smirasve ne Gjeneve /kliko per ta shikuar videon/
P.S. Në shkrim është bashkangjitur vetëm një pjesë e shkurtër e atmosferës e xhiruar me telefon nga Naser Hajrullahu. Ndërkohë do të postohen edhe fotografi dhe video tjera nga festa.
