Shoqëria Civile në komunën e Vitisë ka organizuar një takim me të gjitha subjektet politike, me qëllim të organizimit të protestës për kyçjen e komunës së Vitisë në Autostradën “Arbën Xhaferi” në fshatin Gërlicë.
Në takim kanë marrë pjesë përfaqësues nga LDK, AAK, LVV, NISMA Socialdemorate, por mbështetjen e kanë konfirmuar edhe AKR dhe PDK.
Envet Haziri nga Shoqata e Bizneseve të Komunës së Vitisë ka shprehur shqetësimin për izolimin që do të ju bëhet bizneseve vitiase si pasojë e mos kyçjes në Gërlicë. Përfaqësues nga shoqëria civile kanë folur për pasojat që do të kenë qytetarët e Vitisë nëse nuk do të ketë kyçje, dhe për mënyrën e organizimit të kësaj proteste.
Të gjithë të pranishmit u pajtuan se është momenti i duhur për organizimin e një proteste paqësore për të ngritur shqetësimin e qytetarëve të komunës së Vitisë për kyçjen në fshatin Gërlicë.
Protesta do të organizohet në ditën e inaugurimit të segmentit Bibaj-Doganaj. /Plus TV/
